+-عتب++// بقلم الشاعر//هارون العزاوي

       -+-عتب++

لا تنكطلي عسل من تحجي امل
كون تسكت حكمه وتنكط فعلْ
وكون من نتلاكه مايعرفني اخوي
لو كصيبه نصير لو فتلة حبل
جان سرك بذره بس ضوكته ماي
وصار ذنبك هسه موذنب الطفِل
ما يهمني اليعرج ويفهم شكول
شلون افهّم اليمشي بس اعرج عقِل 
الشجره هي أم السهم.. بس مو قياس
النار ابنها ارماد.. أبد ما يشتعِلْ 
الشجره عاشت.. خاطر تلم الطيور
والسهم بيه سوله عايش عالكتِلْ
اللثكه لو بالكصه مايمسحها ماي
الكصه مو بالماي.. بالدم تنغسِل
الفقير ابيته من يكعد غريب
لايدبج ع السطح كاعد نزل
وكافي تنفخ بالصنم واتحطله صوت
مايغرني السامري بنفخ العجل
هيبة المؤمن تشوف بظهره قوس 
السيف مابي هيبه إذا كلش عدِل
اي ضعيف ومُعْوَج وعمره كصير
ويبقى هو هلال مضمون وشكل
ايوكف العالم إذا يطلع قصاص
وصيته أقوى من الكمر لمن يهل
وشوف تنعد منقبه بثكلك تميل 
الناس تصعدله العثك لو بي هَدِلْ
واحتسيت همومي خمره وماصحيت
وثكلن اجدامي وتطك رجل برجِل
يجوز اسكر بالتعب واوكف واطيح
البلبل يونس إذا كلش ثَمِلْ
وموقياس اليصعد وينزل أكيد
اكو صعده هواي بس تسمه ذِلْ
المطر عالكاع من ينزل جببر
ومن يطيح يكوم جم ميت عَدِلْ
فوك راسك يصعد شرخصه التراب
 وينزل اعله الساك بس غالي الحجِل