أم علي// بقلم الشاعرة((علا فياض سبيتي ))

       أم علي

أم علي مرا عندها صمود جبال
ربّت شباب متل أقمار مضوية
كانت توعى من الصبح بكير
تلم القشات من بقايا ورود جورية
تعجن العجين وتهير الفرنية
ولما تجهز من الاكل ألوان
بيض بلدي وزيتون ولبنة بلدية
تفيق علي ابنها اجمل الخلاّن
يلا عالترويقة يا ضي عينيي
ع رفاقك تاخرت يا زينة الشبان
 ولو قصرت يا ابني لا تعتب عليي

وبغمزة حنان قالت لقمر نيسان
بدي عالبيت تجيب كنة هنية
تبسم الفارس والفكر سرحان
غالي ورخيص الطلب من غير مِنّية 
اليوم يا امي رح نقي عروس
 حقك يا امي تفرحي فيي

خلّص علي الترويقة مع نبع الحنان
قالت ريتو صحة يا امي وهَنية
شافت بعيونو نظرة وداع
وقلها بحقك لو يوم قصرت
سامحيني وارضي عليي
وبقلبو كان عم يهمسلها همسات
 بكرا بترفعي الراس وبتفخري فيي

راح علي وعالدار ما عاد
اسبوع عنو ما في خبرية
وبعد عشر ايام جابوه بزفة عريس
الله أكبر صرخت امو المفجوعة
ريتها هالشهادة مباركة يا امي
والف مبارك عليك الحورية

سمعت همسة لغيرها ما بتنسمع
متل ما وعدتك يا امي جيتك عريس
هيري ورود الزفة وزلغطي يا نور عينية
وما عاد بعد اليوم شوفك واعية بكير
الله معك يا نور العين قوليها
وريتها يا ابني نومة هنية
هاي قصة ام علي بيلبقلها الاسم
وهاي قصة كل مرا جنوبية