ياعم ياعراف ..بقلم الشاعر((منصور ابو قورة))

ياعم ياعراف ..

ياعم يا عراف ..
ياموشوش الأصداف 
أنا .. ليا .. قلب 
ف الحب .. دب
من يومين اتنين
بان عليه الحب 
لقيته بيخاف . 
جناحه صبح مكسور
عدى سبع .. بحور 
اتكسر المجداف !!
البحر هناك جراح ..
والموج طواح 
 ياريته ما حب ..

قلت يمكن محسود 
طقيت له طبق بخور 
عود .. ورا .. عود
والهوى سواح ..
رقيته سبع رؤيات !!
ف حضن سبع بنات
وقريت عليه آيات 
آتاريه كان مسحور
جنية البحر عشقاه 
قلتلها .. ياجنية 
هبنيلك .. كام بنية 
وافرشهم بالحنية 
دوبى ف قلبى أساه !!
سبيه يرجع .. ليا 
أعلمه فنون الحب
واصبره على بلواه 
ما سمعتش كلامى 
ياعم ... يا عراف
وقطفت ورد أحلامى 
 وانا ف الحب .. خواف !!

لقيته فاتح جرابه 
راح يحضر جوابه 
وانا واقف على بابه 
بضرب أخماس ف أسداس 
محتاس ...
مستنى ينادى على قلبى
والقلب .. اللى انشغل بى 
وأوهام زى السواقى
دايرة .. ف الراس
زى الخطاف !!
وراح يتمتم بكلام 
معرفوش ..
قدوش .. قدوش .. قدوش
يا حمروش .. يابنت فنكوش 
وحروف كتير .. مافهمتهاش 
قلت قلبى .. راح بلاش !!
يقطع الحب وسنينه 
واللى عايزيينه ..
وراح يبحلق .. 
يمين .. وشمال 
ويعصب عنيه بالشال 
قلبي وقع ف رجليه !!
قلت قوم ياحزين الضماير 
طلعنى م الورطة ديه 
بلاه الحب .. بالشكل ده
 دا .. تمثيلية !!