الظُّلْم نَـار..بقلم //الشاعر أحمد شاهين ---- مصر -- أسيوط

الظُّلْم نَـار
ــــــــــــــــــــــــــــــــــــــــ
أوعَى تِسْمَع فِي يُوم لِظَالِم
أو حَتَّى تِدِّيلُه الأمَان
مَادَام بِيَاكُل فِي حَق غِيرُه
هَيدُور عَلِيه وَالله الزَّمَـان
لَو كَان فِي قَلْبُه أَي خِير
أو حَتَّى ذَرَّه مِن إيمَان
يِرْضَى بِاللي مَقْسُومْلُه ونَصِيبُه
وِيرَجَّع الحَق اللي بَان
دَه رَبَّك حَكَم سُبْحَانُه شَرَّع
وِانَّك بِتِحْرِم مُش اخْتِيَار
يَا اللي سَارِق لِلحَق اِسْمَع
دِي دُنْيَا فَانْيَه وِ دَه اخْتِبَار
لِسَّه بَاقِي في عُمْرَك يُومِين
اِعْدِل فِيهَا لِرَبَّك اِرْجَع
قَبْل مَا تفَارِق لِطِين
وِتلاَقِي نَفْسَك فِي قَلْب نَار
سَاعِتْهَا تِنْدَم تِتْمَنَّى تِرْجَع
تِبُوس اِيدِيهُم أو حَتَّى تِرْكَع
وِمِين لِلظَّالِم يَا نَاس هَيِشْفَع
وِهُوَّا في جَهَنَّم يَا عِينِي غَار
أوعَى تِسْمَع فِي يُوم لِظَالِم
أو حَتَّى تِدِّيلُه الأمَان
مَادَام بِيَاكُل فِي حَق غِيرُه
هَيدُور عَلِيه وَالله الزَّمَـان
ـــــــــــــــــــــــــــــــــــــــــ

كلمات الشاعر أحمد شاهين
 ---- مصر -- أسيوط ----