(الحلم) 2016.
بقلم الشاعر...محمد الشاذلي
**************
اول ما نبدي القول
نصلى ع النبي الأمي
خاتم الرسل الكرام
حبيبي وموصي بأمي
وصاني بيها مرات تلاته
وأنا بقول له هيا ف دمي
شالتني غصب
وجابتني غصب
وبكل حب قامت تسمي
حست بفرحه جواها طارحه
قالت يارب خلوهلي يمي
ومن ساعتها شايلالي همي
وزاينه بيتنا ولمانا
ومهما يامه نزعل تلمي
لكن يا أمي قلبي حزين
علشان ولادك متفرقين
ونسيو ساعة ما قلتي لينا
خليكو يا ولادي متوحدين
علشان ما يقدر عليكو حد
دا الاتحاد قوي ومتين
تعالي شوفي بقي كل واحد
سايقه هواه رايح لفين
والفرقه بقيت هيا اللي بينا
وبقينا يامه تايهين سنين
ومن ساعتها بقت الديابه
واقفه لنا يامه متنمرين
ماحنا ادينالهم فرصه يا غاليه
لما خدتنا نشوه وحنين
لحلو دنيا ونسينا دينا
وان ربي وصي ف دين
بالاعتصام مش الانقسام
حتي القلوب ما فيها لين
دا حنا يا امي بنتلاقي
وكأننا ما نعرف بعض
وقلوبنا يامه معادش فيها
غير القساوه زايدها بغض
واما بننصح او نوعي
بنلاقي يامه الغباوه رد
هو فاهم انه صح
فاكر بأنه ما زيه حد
يامه يا ريتك كنتي قاسيه
كان زماننا متجمعين
وكان زمانا شوكتنا جامده
تكسر ضهور الغدارين
ياكلوا ف خيرنا
ف قلب بيتنا
وع الاولاد مستأسدين
ياريت فضلنا زي ما كنا
متجمعين متوحدين متسيدين
ع الكون بحكمه لرب رحمه
نزل شريعته للعالمين
ولما هونا علي بعض هونا
وبقينا مطمع للطماعين
اللي مافيهم غير قلب جاحد
لو يدي مره ياخد 200
ما يهمه عايش ميت ما تفرق
مايهمه غير مصلحته فين
والمشكله ولادك يا غاليه
للكدب ديمه مصدقين
قال ايه يا امي خايفين عليهم
يا عم انت بتقول لمين
دي دروس وياما عدت علينا
ما تفرقوا ياللي مستغبين .
ياريتنا يامه ما سبنا حضنك
ولا غفلنا بطرف عين
ياريت يا امي كنتي قاسيه
كنا فضلنا مصحصين
يا امي قومي وشدي حيلك
صحي ولادك الغفلانين
ودا حلم يامه نرجع ف لمه
واديني بدعي يا معين
رجعلي امي تجمع ما بينا
ترد فرحه وتشيل انين
واقعد انا واخواتي تاني
ولدين محمد متمسكين
وقلوبنا ساكناها المحبه
وامنا قاعده تسمي
علي كل واحد مننا
امتي الكلام ده ..... اهو حلم يامي
***********************************************
المصري العربي الحر
الشاعر محمد الشاذلي
ليست هناك تعليقات:
إرسال تعليق