(مدري نضحك مدري نبجي)سمير عبدالواحد الشيخاني

(مدري نضحك مدري نبجي)

.......................

اسمع اسمع، خلي اضحكك 
جان عدنا كم سفيه وسختجي

مثلوا دور المعارض والشريف
وأخذوا أدوار الشجاعة بالبجي

هواي همه، من حزب اسلامي
ووفاق ومنهم اسمه دعوجي

ومنهم الي بالسبح تلكاه خبير
ومنهم بساحات لندن كبجي

حدوا سيوف التقاسم
بالنذالة افعالهم ماتنحجي

وطبت امريكا على خطهم
وكول صار الاحتلال العربجي

واستلم حكم البداية
الجعفري اليصرف حجي

بالبلد صارت كوارث
والقتل صار بفلس بالطوبجي

ونوب رجعوا سلموا
حكم البلد للسبحجي

والزعامة اسم رمزي
صارت لسايق مخدة وخدجي

وشفتوا ما شفتوا بزمانه
وخلصت ايام الشعب لطم وبجي

واحنا هسه بدور حكم
المنتصر ، ذاك العنيف الكبجي

مدري نحجي مدري نسكت
مدري نضحك مدري نبجي

كلشي شوفنه الزمن ، عتاك
يحكم، وابو الكفاءة كهوجي

مدري نركص مدري نلطم
مدري نضحك مدري نبجي

مدري خلونه نحن لعيشه
الخوف وحروب القومجي

ماكو صحوة ولا بقى عدنا
صدر نشكيلة همنه ونتجي

............................
سمير عبدالواحد الشيخاني