مجلة الكاتبــــــــــــه منه حسين الالكترونيه

دوري دوري...بقلم..الشاعرالقدير/مرقص إقلاديوس.


دورى..دورى
بقلم..مرقص إقلاديوس
..................
دورى. يا أرض. دورى
مين عارف
على فين موديانا.
لا إحنا عارفين
إن كنا إحنا إللى تعبينك.
و لا إنت إللى تعبانا.

لا كنا عارفين
إمتى هنيجى
و لا إحنا دلوقى عارفين
إمتى مروحين.
صحيح
يمكن عارفين
ليه جينا.
لكن
مش عارفين
على فين رايحين.
لكن
إنت بتدورى
و إحنا وياكى دايخين.

ياما كتير سألنا
و لا واحد دلنا على إجابات.
ياما كتير
إكتشفنا قوانين
و فى الآخر
طلعت نظريات.
و كل يوم
نقول عليه يوم جديد.
و بيطلع زى إللى فات.
و إنتى تدورى
و إحنا وياكى دايرين.

و فجأة يطب..

فينه...

يقولك مات.

و عجب العجب بأه.
إن فيه ناس
خايفة من الموت
و ناس بتتمناه.
تعبت
و نفسها ترتاح
عانت كتير من جراح.
و ياما صرخت
و لا حد سمع الصياح.
عايشة فى ليل طويل
ما بيطلعلوش صباح.

و ناس بتحب الحياة.
و بتحب الناس.
لكن ما بقاش 
للى زيهم فى الدنيا مكان.
ما بقاش لهم خلان.
يظهر مخلوقين 
من طينة تانية.

ازاى

مش عارف
لكن أهو ده اللى كان.

دورى يا أرض دورى
دورى كمان و كمان.
كل ما الأرض تدور
اوعى تنسى
اللحظة بتقرب..بتقرب.
و من غير ما تدرى
هتيجى اللحظة
و نرتاح بأه من الدوران.
                 ملاح بحور الحكمة
                 مرقص إقلاديوس
*******************************************
(رئيسةالتحرير).ياسمينةالكاشف/تحياتي.